Fimmta breiðskífa Mikaels, Half Sun, mun koma út sumarið 2026 og verður sú tónlist í forgrunni á tónleikunum. Kvintett Mikaels Mána mun einnig flytja eldri lög frá fyrri plötum ásamt tökulögum í ferskum útsetningum. 


Kvintett Mikaels er skipaður Mikael Mána á gítar, Henrik Linder á bassa, Magnúsi T. Elíassen á trommum, Lilju Maríu Ásmundsdóttur á metalafón og Tómasi Jónssyni á hljómborð. Þetta er ævintýraleg samsetning af hljóðfæraleikurum sem eru þekktir fyrir breiðan skala tónlistarstefna, frá popp-fusion til klassískrar samtímatónlistar. Hljómsveitin hefur ekki komið oft fram í þessari mynd og er því um sérstakan viðburð að ræða þar sem þau munu þræða plötuna sem þau tóku upp á síðasta ári.

Mikael er gítarleikari og tónskáld með einstakan og persónulegan stíl sem ekki er auðvelt að flokka. Tengsl hans við djass birtast helst í nálgun hans á hljóðfærið frekar en í skýrri tengingu við ákveðna stefnu eða kanónu. Í tónlistinni má greina áhrif frá norrænum sönglögum, rokktónlist, impressjónisma og ekki síst einstakan, kvikmyndalegan blæ.
 Alþjóðlegir miðlar hafa lofað sérstakan stíl Mikaels og einlægan tónlistarflutning hans. Fyrri plata hans, Guitar Poetry, kom út í mars 2024 og er frumútgáfa hans fyrir þýska útgáfufyrirtækið ACT, eitt af leiðandi djassútgáfufyrirtækjum Evrópu. Platan hlaut 4,5 stjörnu dóm í DownBeat, einu virtasta djassriti síðustu áratuga.


Mikael er fæddur og uppalinn í Reykjavík og hlaut verðlaun fyrir djassplötu ársins á Íslensku tónlistarverðlaununum fyrir fyrri plötu kvintetts Mikaels, Innermost. Hann vakti fyrst verulega athygli með frumraun sinni Bobby (concept-plötu sem byggir á lífsreynslu hins umdeilda stórmeistara í skák, Bobby Fischers). Platan fékk spilun á BBC Radio 3 og 6, á íslenskum og frönskum ríkisútvarpsstöðvum, og vinsælasta lagið af plötunni hefur náð yfir 1.200.000 spilunum á Spotify. Önnur plata hans, Nostalgia Machine, kafaði enn dýpra í tónlistarheim hans.


Mikael er hluti af nýrri bylgju íslenskra tónlistarmanna sem njóta alþjóðlegrar viðurkenningar, og verk hans endurspegla vel þann nýskapandi anda sem einkennir lifandi tónlistarsenu Íslands.

“AN IMPRESSIONISTIC GEM.” ★★★★1⁄2 Downbeat(US)

MIÐASALA