Söngkonurnar Anna Gréta og Silva Þórðardóttir sameina krafta og bjóða upp á hugljúfar ábreiður, frumsamið efni og uppáhalds jazzinn sinn. Silva og Anna Gréta hafa verið bestu vinkonur síðan á unglingsárunum og þróað með sér einstakt samspil og sameiginlega tilfinningu fyrir túlkun. Þær koma núna fram í fyrsta skipti með frumsamið efni sem þær hafa unnið að saman og með þeim leikur Þorleifur Gaukur Davíðsson á pedalsteel og munnhörpu og gítar. Þorleifur Gaukur er einn eftirsóttasti tónlistarmaður Íslands í dag og hefur m.a. túrað með Kaleo, tekið upp með Laufeyju og gefið út plötuna "Lifelines" sem hlaut einróma lof gagnrýnanda.
Silva Þórðardóttir hefur um árabil verið meðal vinsælustu jazzradda landsins. Hún gaf út plötuna Skylark árið 2019 og hefur hlotið þrjár tilnefningar til Íslensku tónlistarverðlaunanna fyrir jazzsöng, auk þess að koma reglulega fram með Jazzkonum og mörgum af fremstu jazzleikurum Íslands.
Anna Gréta, píanóleikari, söngkona og tónskáld, hefur vakið athygli á Norðurlöndum og víðar með plötum sínum Nightjar in the Northern Sky (2021) og Star of Spring (2024) á vegum ACT Music. Hún hefur unnið íslensku tónlistarverðlaunin þrisvar sinnum og skapað sér sterkan sess sem ein áhugaverðasta jazztónlistarkona sinnar kynslóðar.
Silva Þórðardóttir - söngur
Anna Gréta - söngur, píanó og hljómborð
Ómar Guðjónsson - pedal steel og gítar